1Jo 3 | MED | STEP | Got ndi, tᵾn numan minal ngorum uⱡ ei, enim pilik kun itᵾi! Tᵾn kundpa elim nga kangambuⱡa kᵾⱡ nᵾtᵾm uⱡ ei ndi ora ndupa, Got ndi, tᵾn numan minal ngorum. Kupa, tᵾn elim nga kangambuⱡa mbᵾ mormin! Ei kᵾn, mᵾi kona wamp mbᵾ ndi, Got pili napᵾtmᵾn. Ei mel ku, tᵾn pilik poⱡ ndᵾi nandᵾrmᵾn ku.

1 John 3

Tᵾn Got Nga Kangambuⱡa Raⱡpᵾn Muⱡᵾmin

1 Got ndi, tᵾn numan minal ngorum uⱡ ei, enim pilik kun itᵾi! Tᵾn kundpa elim nga kangambuⱡa kᵾⱡ nᵾtᵾm uⱡ ei ndi ora ndupa, Got ndi, tᵾn numan minal ngorum. Kupa, tᵾn elim nga kangambuⱡa mbᵾ mormin! Ei kᵾn, mᵾi kona wamp mbᵾ ndi, Got pili napᵾtmᵾn. Ei mel ku, tᵾn pilik poⱡ ndᵾi nandᵾrmᵾn ku. 2 Na nga wamp angmᵾn! Tᵾn wamp kᵾⱡ, akup Got nga kangambuⱡa kᵾⱡ mormun. Wote pemba uⱡ ei, kᵾni nakᵾndᵾpᵾn mormin. Wote, Kraist elim yant om ui ei kᵾn, tᵾn elim mel mendpᵾⱡ muⱡmin. Ei nambuⱡ emel, ui ei kᵾn, elim morum ei mel mendpᵾⱡ muⱡmin ndam, elim kupa kun kᵾnmin. 3 Wamp nam ti ndi, Kraist nokundpa moⱡpa, elim kun kai moⱡum ndam, Kraist elim kun kai morum ei mel moⱡmba.

4 Nambuⱡ emel, mi go ndui uⱡ ei, uⱡ kit iti uⱡ ei etmin. Wote, wamp nam ti ndi, uⱡ kit em ndam, Got nga mi ik ropa puⱡa romba. 5 Akup enim pilik kai itᵾi! Kraist ndi, tᵾn nga uⱡ kit mbᵾ, wak rundimp nimba mana urum. Elim kᵾn uⱡ kit ti pi napᵾtᵾm. 6 Ei nga, wamp nam ti, Kraist kᵾn rᵾmp ndupa morum ti, uⱡ kit iti natᵾtᵾm. Wote uⱡ kit etᵾm wamp ti, Kraist kᵾni nakᵾndrᵾm, wote pili napᵾtᵾm ku.

7 Na nga kangambuⱡa kᵾⱡ, enim wamp ti ndi, tᵾpa tiki pundi napᵾndangga! Kraist elim kun kai morum ei mel, wamp ti, enim uⱡ kun kai mbᵾ em ndam, elim kun kai moⱡmba. 8 Wamp nam ti ndi, uⱡ kit mbᵾ, rᵾk rᵾk etpa mint moⱡum ndam, Seitan nga wamp raⱡpa morum. Nambuⱡ emel, Seitan ndi, kuimp tepa uⱡ kit etᵾm puⱡ wu murum. Wote, Got nga Kangᵾm mana urum ei, Seitan nga kongun mbᵾ, rop mbuⱡ mbaⱡ itimp nimba urum. 9 Wamp nam ti, Got nga kangambuⱡa raⱡpa morum wamp ei, uⱡ kit mbᵾ iti natᵾtᵾm Got kᵾn rᵾmp ndupa, morum wamp ti ndi, uⱡ kit mbᵾ iti natᵾmba. Ei nambuⱡ emel, Got tᵾpa, Tipam randpa moⱡpa, uⱡ kit mbᵾ iti natᵾtᵾm. 10 Ei nga, Got nga kangambuⱡa mbᵾ kᵾn, Seitan nga kangambuⱡa mbᵾ kᵾn, kandpᵾn mbi ndumin. Wamp ti, uⱡ kun kai mbᵾ iti natᵾpa, wote ᵾngᵾn numan ngui ngangᵾm ndam, ei Got nga kangambuⱡa ti mon!

Nim Ndi Wamp Ʉngᵾn Ti Numan Ngui

11 Unt kuimp tep pᵾtᵾng ik ni, wamp ᵾngᵾnᵾl mat numan ngᵾmᵾn! 12 Tᵾn ndi, kang wu Kein itim uⱡ kit ei mel, iti nᵾtᵾmin. Elim nga ᵾngᵾn ei, kandpa kelpa ropa kᵾndrᵾm. Kein ndi, ᵾngᵾn ei, nambuⱡ emel, ropa kundrum? Elim nga itim uⱡ kit mbᵾ, Seitan nga kang wu ti murum. Wote, ᵾngᵾn kurum ei nga itim uⱡ mbᵾ, kapⱡa itim. 13 Na nga angmᵾn! Mᵾi kona ila wamp mbᵾ ndi, enim numan ngui ngangᵾng ndam, mundmong iti nᵾtᵾi! 14 Tᵾn pᵾtmin ni, wamp kui nga uⱡ kit ei, wak ropᵾn ombun, wamp kont mul uⱡ ei, kandᵾp titmin. Ei nambuⱡ emel, tᵾn uⱡ ei, wamp ᵾngᵾn mbᵾ kᵾn, numan ngurmᵾn. Wamp ti ndi, ᵾngᵾn numan ngui ngangᵾm ndam, wamp kui nga uⱡ ei, tepa morum. 15 Wamp ti ndi, elim nga ᵾngᵾn numan ngui ngangᵾm ndam, ᵾngᵾn ropa kondrum mel etᵾm. Enim pᵾtmin ni, wamp ti ndi, ᵾngᵾn ropa kondrum ndam, uⱡ nga kᵾnt nga kont mul uⱡ ei, wamp ei kᵾn pi napᵾtᵾm. 16 Ei nga, tᵾn pᵾtmᵾn ni, wamp numan ngui uⱡ ei etmᵾn. Nambuⱡ emel, Kraist ndi, tᵾn numan ngumba, elim mana ndupa, tᵾn nga nᵾndpa kurum. Ei nga, tᵾn ndi, i ku etpᵾn, tᵾn nga ᵾngᵾnᵾl mbᵾ numan ngᵾmin. 17 Wu mel pi ti ndi, moⱡpa kᵾn, ᵾngᵾn kurpa nangga nimba, wal pᵾki na mat ngui nganggᵾpa, kandpa kui em ndam, Got nga wamp numan ngui uⱡ ei, namba etpa, wu ei kᵾn pemba? 18 Na nga kangambuⱡa kᵾⱡ, tᵾn ndi, wamp numan ngui uⱡ ei, keta ila mint ik ni nanᵾmᵾn mon! Wote, wamp numan ngui uⱡ kupa ei, uⱡ kun kai mbᵾ etᵾp mot ndᵾmin. 19 Uⱡ i etpᵾn kᵾn, tᵾn wamp numan ngui uⱡ kupa ei enmin, nᵾmp pilᵾmin. I etpᵾn kᵾn, Got nga kuimp keta ila numan wang ndupᵾn muⱡᵾmin. 20 Wote, tᵾn nga numan orunga ndi, tᵾn uⱡ kit mat itmᵾn nim ndam, wote Got nga kuimp keta ila numan wang ndᵾmin. Nambuⱡ emel, Got nga numan ronduⱡ ei ndi, tᵾn nga numan orunga, kandpa pora ndupa, mel mbᵾ pora pᵾtᵾm.

21 Ei kᵾn, na nga wamp mᵾn kᵾⱡ! Tᵾn nga numan ila uⱡ kit mat pi napᵾm ndam, Got nga kuimp keta ila ronduⱡ mundpᵾn muⱡmin. 22 Ei kᵾn, tᵾn ndi, Got waldᵾtmᵾn ei kᵾn, Got ndi, mel mbᵾ ngorum. Nambuⱡ emel, tᵾn ndi, elim nga mi ik kᵾⱡ pilpᵾn, teng ndupᵾn kᵾn, elim nga numan ngorum uⱡ mbᵾ etmin. 23 Got nga mi ik ei ndi, nimba mel, Kangᵾm Jisas Kraist nga mbi ila mondᵾk pilik, wamp ᵾngᵾnᵾl mbᵾ kᵾn, numan nguk mᵾn mondᵾk itᵾi! 24 Wamp nam ti ndi, Got nga mi ik kᵾⱡ pilpa tᵾtᵾm ndam, Got ei omba, wamp ei kᵾn moⱡnga, wamp ei, Got kᵾn morum. Uⱡ ila, Got tᵾn kᵾn nambuⱡ emel morum? Uⱡ ei, pᵾtmᵾn ni, Got nga Muⱡnga Wingti tᵾn ngurum.